Македонската младинска карате репрезентација, составена од вкупно 74 талентирани спортисти, со голема мотивација и желба за успех ќе го брани угледот на македонското карате на престојното Балканско првенство за кадети, јуниори и помлади сениори (У21). Натпреварите ќе се одржат во Риека, Хрватска, во периодот од 7 до 9 ноември, и ќе соберат над 1.200 натпреварувачи од 13 балкански земји, што ветува вистински карате спектакл.
Нашата репрезентација ќе настапи со натпреварувачи во сите категории, како во ката, така и во кумите, а селекторите веруваат дека младите каратисти ќе ја покажат својата целосна подготвеност, техничка извонредност и спортски дух што ги карактеризира во последните натпреварувачки сезони. Зад нив стои голем тим на тренери, судии и официјални претставници кои вложија многу труд во подготовките во изминатите месеци.
Бидејќи ова првенство претставува едно од најзначајните во регионот, за многумина од нашите млади каратисти тоа ќе биде и прво големо меѓународно искуство, можност да стекнат самодоверба и да направат важен чекор кон европските и светските натпреварувања што следат.
Очекувањата се секогаш високи – македонските каратисти и во минатото покажале дека можат да се борат рамноправно со најдобрите на Балканот, а овојпат со уште поголема мотивација ќе се обидат да ја збогатат колекцијата на медали за нашата земја.
