Големо признание за македонското судиско тело – три македонски судиски тројки оваа недела ќе делат правда во натпревари од младинската Лига на шампиони под покровителство на УЕФА.
Нашите арбитри добија доверба да делат правда на натпревари од различни групи во ова елитно младинско натпреварување, што е јасен показател за напредокот и довербата што УЕФА ја има во македонските судии.
Првата тројка, предводена од Игор Стојчевски, со асистентите Ристо Ѓорѓиев и Вјолца Изеири, ќе ја дели правдата на дуелот меѓу Баник Острава од Чешка и белградска Црвена Звезда.
Во Виена, главен судија ќе биде Јован Качевски, кому ќе му помагаат Даниел Василевски и Давор Цветаноски на мечот меѓу Австрија Виена и израелскиот Макаби Хаифа.
Третиот македонски судиски тим ќе патува на Фарските Острови, каде што Влатко Илиоски, Куштрим Лика и Зоран Јанкуловски ќе го судат натпреварот меѓу Викингур и белгискиот Генк.
Ваквата бројност на македонски судии во меѓународни рамки е реткост и претставува доказ дека домашното судење е во подем и дека македонските арбитри чекорат кон највисоките европски стандарди.
