Младата фудбалска репрезентација на Македонија до 18 години одигра 2:2 против своите врсници од Словачка на контролен натпревар во Дунајска Стреда. Избраниците на селекторот Димитар Капинковски прикажаа борбена и квалитетна игра, со што заслужено се изборија за позитивен резултат на гостински терен.
Словачка подобро го отвори натпреварот и уште во раната фаза поведе со погодокот на Филип Рајчан. Сепак, македонските надежи не се обесхрабрија и до крајот на првото полувреме успеаја да направат целосен пресврт. Најпрво Мустафи во 26. минута погоди по одличен прекин изведен од Талевски, а во 44. минута Илијази со убав удар од далечина донесе предност од 2:1.
Во вториот дел, Сејменов имаше стопроцентна шанса за зголемување на предноста, но не реализираше, а казната стигна во 56. минута кога Новак израмни на 2:2. Неколку минути подоцна, голманот Александар Трајков блесна со одбрана на пенал, спречувајќи пресврт на домаќините. Во самиот финиш Македонија беше блиску до победа, но ударот на Рочи заврши во пречката.
Ова беше првиот од двата тест натпревари помеѓу двете селекции, а вториот дуел е закажан за четврток, повторно во Дунајска Стреда.
Словачка до 18 години:
23. Томаш Јаблоницки, 3. Роман Скалиќан, 4. Маеван Винсент, 5. Петер Пител, 7. Адам Лабо (66` 6 Алекс Жига), 10. Мартин Јенчуш, 11. Марош Новак (75` 9 Давид Полтак), 13. Вилијам Врабел, 15. Максим Матеаш (86` 16 Федор Касана), 18. Филип Рајчан (66` 17. Патрик Тејзер), 19. Марио Рабатин (46` 8. Мате Роланд Фехер), Селектор: Мартин Фабуш
Македонија до 18 години:
1. Александар Трајков, 3. Стефан Секирски, 4. Стефан Стаматоски, 5. Андреј Димовски, 6. Мухамед Мустафи, 7. Дамјан Буцевски (60` 18. Иво Марковски), 8. Габриел Талевски (60` 9. Лука Варошаноски), 9. Матеј Сејменов (66` 16. Флорент Османи), 10. Иван Танчев (75` 11 Мартин Горгиев), 13. Флори Илијази (75` 2 Албан Рочи), 20. Бојан Велков; Селектор: Димитар Капинковски
