АП Брера и Шкупи денеска во Струмица ќе се сретнат во рамките на петтото коло од Првата лига, во дуел кој може да биде пресвртница за двете екипи. Натпреварот ќе се игра на стадионот „Младост“ со почеток од 15:30 часот.
Струмичкиот тим по четири одиграни натпревари има два бода и сѐ уште чека на првата победа во сезоната. Дополнителен предизвик е тоа што од минатата недела тимот остана без тренерот Панче Стојанов, кој поднесе оставка, како и без младинскиот репрезентативец Мартин Ѓорѓиевски кој направи трансфер во чешкиот Збројовка Брно. Сепак, од Брера порачаа дека нема откажување и дека целта е јасна:
„Нема предавање, напротив, одиме на победа против Шкупи“, истакнуваат од клубот.
Од друга страна, Шкупи се обиде да ја крене самодовербата со победата над Кожуф во Купот на Македонија, а сега ќе се обиде тоа да го пренесе и во првенството, каде што по четири кола остана без освоен бод. Еден од носителите на играта, Џихан Адили, нагласува дека тимот е целосно фокусиран на предизвикот:
„Среќен сум што постигнав гол на Куп натпреварот, но за мене најважно е настапот на тимот. Очекуваме тежок натпревар против Брера и знаеме дека мора да го дадеме својот максимум за да оствариме позитивен резултат,“ изјави Адили.
Со оглед на тоа дека обата тима се без победа во досегашниот тек на шампионатот, дуелот во Струмица носи дополнителна тежина и може да биде моментот на пресврт за победникот.
