АП Брера Струмица остана без шеф на стручниот штаб. Тренерот Панче Стојанов по само четири одиграни кола во новата сезона реши да поднесе оставка, при што нагласи дека неговата одлука е од лични причини и не е поврзана со резултатите на тимот.
„Оставката е лична бидејќи во моменталните околности не можам да ја реализирам мојата визија и планови со екипата. Верувам дека Брера има потенцијал и сум убеден дека со посветена работа може да се исполни главната цел, а тоа е опстанок во Првата лига“, изјави Стојанов по заминувањето.
Стојанов е долгогодишен дел од проектот на Академија Пандев, сега Брера Струмица, уште од неговите почетоци. Минатата сезона ја презеде екипата во пролетниот дел и успеа да го оствари главниот приоритет – да обезбеди опстанок во елитата. Со неговото искуство и познавање на тимот, беше голема надеж дека ќе продолжи да го гради клубот и оваа сезона.
Сепак, по воведните натпревари, одлучи да се повлече. Брера на гостински терен забележа ремија со Вардар (2:2) и Тиквеш (0:0), што навестуваше дека тимот може да биде конкурентен, но искусниот стратег сметал дека условите не се соодветни за да ја спроведе неговата спортска визија.
Со оваа одлука клубот од Струмица повторно е во потрага по нов тренер кој ќе ја преземе одговорноста и ќе се обиде да ја стабилизира екипата во продолжение од сезоната. Од управата на Брера се очекува наскоро да соопштат кој ќе биде новиот предводник на тимот или кој ќе ја има улогата на в.д. тренер до избор на ново решение.
