Ракометарите на ГРК Охрид приредија вистинска ракометна вечер и пред својата публика го освоија првиот трофеј на домашниот меморијален турнир „Крсте Андоновски“. Во финалниот натпревар, одигран во СРЦ „Билјанини Извори“, охриѓани ја совладаа екипата на Еурофарм Пелистер со 31-26, освојувајќи ја титулата во голем стил.
Битолчани го отворија мечот подобро и поведоа со 0-2, но „гладијаторите“ од Охрид брзо ја презедоа иницијативата и со серија од пет неодговорени погодоци направија целосен пресврт за водство од 5-2. Тренерот на Пелистер, Рубен Гарабаја, се обиде да ја консолидира играта преку тајм-аут, а неговите избраници успеаја да се вратат во егал и дури поведоа со 10-9. Сепак, домаќините одговорија со силна серија и на одмор заминаа со предност од 12-10.
Во второто полувреме охриѓани играа уште поорганизирано и дисциплинирано. Одбраната на Борис Ројевиќ функционираше одлично, голманот Блажески имаше клучни интервенции, а нападот предводен од Дарко Ѓукиќ и Ловро Јотиќ постојано ја користеше секоја грешка на противникот. Охрид поведе со највисоки +5 (23-18), што донесе нов тајм-аут за Пелистер.
И покрај тоа, пелистерци се вратија на минус два (24-22) и во неколку наврати имаа шанси да ја направат завршницата поинтересна, но Охрид не дозволи изненадување. Со прецизни удари на Кукуловски и смирената игра во нападот, домаќините ја одржуваа предноста и на крајот триумфираа со заслужени 31-26.
Дарко Ѓукиќ беше најефикасен кај победничкиот тим со шест погодоци, а одличен настап имаше и Ловро Јотиќ со четири. Кај Еурофарм Пелистер најмногу се истакна Дејан Манасков со седум гола.
Со ова, охриѓани го освоија првиот трофеј на својот меморијален турнир, а втор последователен ова лето, по успехот на Струшкиот турнир. Публиката во Охрид имаше повеќе од причина за славје – „гладијаторите“ уште еднаш потврдија дека ќе бидат сериозен конкурент на врвот во претстојната сезона.
