Македонскиот шампион ЖФК Љуботен започна да ја реализира втората фаза од летните подготовки во Златибор, Србија.
Тетовскиот тим на 25 јуни ги започна подготовките за новата сезона, а сега втората фаза се реализира во Златибор, а фудбалерките пристигнаа на 7 јули.
Во рамки на главната фаза од подготовки закажани се два пријателски натпревари со екипата на Брезница, а пак на 20 јули ќе го пречека шампионот на Малта, а тоа ќе биде воедно и генералка пред првиот меч од квалификациите за Лигата на шампиони на 30 јули.
Паралелно со подготовките на тимот се врши и подобрување на инфраструктурата со темелна реконструкција на базата мотел „Плави“, со што треба да се добијат комплетно реновирани соби и ресторан, каде ќе бидат сместени фудбалерките и ќе имаат подобри услови и за исхрана.
Дополнително се врши и реконструкција и на соблекувалните и на теренот во село Желино, со што ЖФК Љуботен се стреми да обезбеди одлични услови за тренинг на сите категории.
