Фудбалерите на второлигашот Вардар Неготино со револт поради неисплатените плати во втората полусезона односно пролетниот дел.
Како што се вели во соопштението објавено на страната на навивачката група „Винари Неготино“, на фудбалерите им била исплатена една од вкупно пет плати, а фудбалерите имаат поддршка од навивачката група „Винари Неготино“.
„Ние играчите на ГФК Вардар Неготино изразуваме револт кон управата и градоначалникот поради неисплатени плати во втората полусезона, исплатена една од вкупно 5 плати, како и дел од премиите кој ни беа ветени од минатата сезона. Со овој повик сакаме да биде запознаена јавноста во Неготино околу ситуација во клубот. Ние како група која е секогаш тука за клубот и градот ги подржува фудбалерите и бара одговорност од горе наведените“, се вели во соопштението објавено на профилот на социјлната мрежа фејсбук на „Винари Неготино“.
Ова е вторпат јавно фудбалерите да ги бараат своите заостанати плати. На почетокот од месец мај фудбалерите јавно излегоа и бараа исплата на заостанатите плати, а сега одново ги бараат платите за втората полусезона.
Екипата на Вардар Неготино во самиот финиш од сезоната го обезбеди директниот опстанок во Втората лига и ќе игра и следната сезона во Втората лига.
