Трибината на стадионот во Куманово ќе „крца“ и ќе биде полна до последното седиште – Башкими повикува на масовна поддршка од навивачите за нивниот последен натпревар на домашен терен од тековната сезона во Втората лига.
Башкими, во рамки на претпоследното 29. коло од Втората лига, ќе се соочи со радовишкиот Детонит Плачковица. Победата е особено важна за клубот, а исходот од сезоната ќе зависи и од одлуката на Дисциплинската комисија во врска со натпреварот против Кожуф од 28. коло.
„Почитувани навивачи на ФК Башкими 1947, оваа сабота се игра последниот домашен натпревар за оваа сезона – важен момент за нашиот клуб и за целиот град! Подготвивме прекрасна атмосфера! Ги повикуваме сите љубители на фудбалот да бидат присутни на стадионот најмалку 15 минути пред почетокот на натпреварот, за нашиот организиран настан да биде уште поубав и заедно да ја покажеме љубовта кон клубот. ФК Башкими 1947 е гордоста на Куманово – да бидеме обединети и да дадеме сè од себе за да ја завршиме сезоната со достоинство и гордост“, се вели во соопштението на ФК Башкими.
Гостинот од Радовиш ќе биде сериозен предизвик за Башкими, бидејќи Детонит Плачковица важи за тврд противник против кого тешко се освојуваат бодови. Натпреварот меѓу Башкими и Детонит Плачковица се игра во сабота со почеток од 17:00 часот.
