Нашиот најдобар автомобилист Игор Стефановски – Иџе, овој викенд ќе се натпреварува на третата трка од сезоната во Европскиот шампионат на ридски патеки, која ќе се одржи на легендарната патека Рампа да Фалепра, лоцирана во близина на португалскиот град Брага.
Оваа брза и технички предизвикувачка патека не му е непозната – Иџе има две победи токму на оваа патека , што му дава дополнителна самодоверба во пресрет на новиот настап. Како што истакна пред трката, тој е мотивиран и максимално подготвен да се врати на подиумот.
Стефановски настапува со импресивниот Ферари 488 Б8 – возило специјално подготвено за ридско возење, кое досега му донесе две солидни трки и трето место во генералниот пласман.
Зад него стои искусна екипа и силна поддршка од спонзори, меѓу кои се издвојува Видеолотарија Касинос Австрија. Со нивна поддршка, Иџе повторно ќе го носи македонското знаме на европските патеки, подготвен да се бори со најдобрите и да донесе нови причини за гордост.
Виолета Јанчева, Спортска Мрежа
