Вечерва се одигра натпреварот помеѓу Охрид и Алкалоид во ,,Билјанини Извори’’. Охрид беше одличен противник во поголем дел од мечот, играше борбено и пожртвувано… многупати изедначуваше, се враќаше од четири негатива, имаше расположен голман и расположени шутери, меѓутоа сепак на крајот повторно доживеа пад на концентрацијата и криза во играта, па така тимот од Автокоманда ја зголеми разликата и на крајот ги освои бодовите со конечен резултат 36:28.
Во изјава за Спортска Мрежа, тренерот на Алкалоид- Кирил Лазаров го коментираше денешното дерби.
„Сакам да им честитам на моите ракометари, како и на ракометарите на Охрид, за фер и коректната игра. Горд сум на екипата, на целиот тим, затоа што победивме една екстра квалитетна екипа со екстра квалитетни играчи и тренер, исто така.. и навистина сум горд на ова што го видов вечерва од моите играчи. Играчите на Охрид, во повеќе наврати беа на чекор да го победат и Еурофарм Пелистер, и Вардар, така што денес навистина бевме, ајде можам да кажам перфектни..совршени за да можеме да извојуваме победа од осум голови разлика. Ние имаме наш пат, даваме шанса на наши, македонски играчи..сакаме да произведеме, да создадеме, трпеливи сме и бараме трпеливост и коректност затоа што работиме за државата и за Македонија. Треба да имаме..да произведуваме квалитет. Значи средствата кои ги инвестира нашиот спонзор ги инвестираме во огромен дел во наши деца“, рече Лазаров за Спортска Мрежа.
Во наредното коло Охрид ќе му гостува на Тиквеш во Кавадарци, а Алкалоид ќе биде домаќин на Бутел.
