До Спортска Мрежа пристигна известување од неколку фудбалери кои на полусезона заминаа од фудбалскиот клуб Кожуф дека во целост не се исплатени, односно си ги бараат своите плати како што биле договорени.
Како што велат фудбалерите, тие кои одлучиле да заминат на полусезона, а како што се вели во известувањето поради неподносливите финансиски услови, не се исплатени во целост, односно не им се исплатени сите плати.
Според тврдењето на фудбалерите, тие кои и натаму се во клубот се исплатени во целост и ги добиваат платите редовно.
„Фудбалерите на ФК Кожуф кои го напуштија клубот поради неподносливите финансиски услови сè уште ја чекаат ветената исплата на своите плати. И покрај тоа што беше ветено дека ќе добијат барем дел од заостанатите примања, исплатата за ноември не е реализирана, а одговорните лица молчат за оваа ситуација“, се вели во известувањето кое пристигна до Спортска Мрежа.
Меѓу фудбалерите кои заминаа се и искусниот Бојан Најденов, Александар Ѓорѓиески, Филип Манасиевски, Александар Богданоски, Дарко Грозданоски, Даниел Иванов и голманот Кристијан Ѓорѓиевска кои си ги бараат своите плати.
Ова не е прв случај кога фудбалери кои заминале од некој клуб да не ги добијат во целост платите за тоа што го сработиле, односно тренирале и одиграле. Останува да видиме дали ќе реагира клубот и дали играчите ќе биде во целост подмирени со нивните плати, како што се вели во нивното известување за исплатата за ноември 2024 година која не е реализирана.
