Одбојкарите на Струмица вечерва во штипската сала „Јордан Мијалков“ беа поразени од актуелниот освојувач на Купот на Македонија, екипата на Штип УГД со резултат од 3:1.
Шампионот Струмица првиот сет го загуби со резултат од 25:20, вториот сет штипјани го добија со 28:26 што беше повеќе од возбудлив и неизвесен.
Во третиот сет Струмица беше подобра, откако сетот го доби со 18:25, а пак во четвртиот сет штипјани беа подобри со 25:19 со што го добија натпреварот со 3:1 во сетови.
„Морам да признаам дека не го одигравме натпреварот онака како што посакувавме и онака како што се спремавме. Радува фактот дека и покрај сè, покажавме победнички менталитет и го добивме натпреварот со 3-1, резултат кој моментално нè избива на првото место на табелата. Време за одмор нема, веќе во сабота ни следи доста важен натпревар протв Работнички на гостински терен, за кој мораме добро да се подготвиме и да одиграме на високо ниво доколку сакаме да извојуваме победа, а со тоа и да го задржиме првото место на табелата“, ни изјави тренерот на Штип УГД, Кристиан Ристески.
За Штип УГД ова е голема победа, тимот предводен од тренерот Кристиан Ристески атакува на двојна титула. Штипјани сакаат одбрана на Куп титулата и атак на титулата во лигата, а пак Струмица сака одбрана на титулата и атак на Куп титулата.
Колку за потсетување и двете екипи се во завршницата од одбојкарскиот Куп на Македонија, а завршницата ќе се игра во Радовиш во СРЦ „25 Мај“ на почетокот од месец април.
