Утре со почеток од 18 часот во спортската сала „Јордан Мијалков“ ќе се одигра големото одбојкарско дерби меѓу освојувачот на Куп титулата, Штип УГД и актуелниот шампион Струмица, а во рамки на 7. коло од втората фаза на Првата одбојкарска лига.
Ова ќе биде вистиски празник на одбојката, Штип УГД веќе сериозно вложува и го подига нивото на одбојката во Македонија, штипјани се наметнуваат како сериозни носители во Првата одбојкарска лига, лани го освоија Купот за првпат, сезонава сакаат одбрана на Куп титулата и ја напаѓаат титулата во лигата која ја брани Струмица.
Тренерот на Штип УГД, Кристиан Ристески, за Спортска Мрежа истакна дека се подготвени за натпреварот со Струмица, ја повика публиката да дојде во салата и со нивна поддршка да атакуваат на победа.
„Го пречекуваме шампионот на Македонија, ОК Струмица. Мислам дека поголема мотивација од тоа во овој момент за нас не постои. Спремни сме и физички и тактички за овој натпревар и со нетрпение го очекуваме. Лично, очекувам да биде тоа одбојкарски празник каде ќе гледаме голема борба за секој поен. Ја повикуваме публиката за поддршка, која ќе ни биде дополнителна мотивација за победа и во овој натпревар“, изјави за Спортска Мрежа, тренерот на Штип УГД, Кристиан Ристески.
Натпреварот започнува во 18 часот и повеќе од сигурно е дека салата „Јордан Мијалков“ во Штип ќе биде исполнета до последното седиште.
