Денес се отвара деветтото коло во Втората женска фудбалска лига, со мечот на „Цементарница“ каде Вардар во улогата на голем фаворит ќе го пречека „фенерџијата“ Борец.
Девојките на Теодора Димитровска ќе атакуваат на седмиот сезонски триумф, пред Вардар е цел да се сочува второто место и преку нов бараж тимот да се обиде да обезбеди историско учество во Првата женска фудбалска лига.
Вардар тргна одлично со триумф против Плачковица од Радовиш со 0:4 на теренот во Раклиш.
Борец во претходното коло на домашен терен беше убедлив против Победа од Валандово и тоа беше донекаде и изненадување, но и натаму тимот од Велес останува „закован“ на дното и тоа со само еден бод, откако претходно на Борец му беа одземени три бодови.
Натпреварот на „Цементарница“ ќе започне во 10 часот, а правдата ќе ја дели Моника Даштевска од Скопје.
Колото ќе се комплетира утре со останатите три натпревари. Лидерот Кочани на домашен терен ќе го пречека тимот на Порече од Македонски Брод. Домаќинот по ремито со Билјанини Извори во претходното коло сега ќе цели кон висока и сигурна победа на патот кон враќање во Првата лига.
Гостинот од Македонски Брод е свесен за тежината на мечот и оди со цел да одигра што е можно подобро против најквалитетни тим во лигата.
Натпреварот ќе започне во 14 часот, а главен судија ќе биде Александра Спасова од Свети Николе.
Билјанини Извори како голем фаворит на теренот со вештачка трева во Охрид ќе ја пречека радовишка Плачковица. Охриѓанки по ремито со лидерот во Кочани, утре против радовишкиот тим ќе атакуваат на голем триумф со што Билјанини Извори ќе продолжи да притиска за да го освои второто место и преку бараж да се обиде да се врати во елитата.
Натпреварот е закажан за во 11 часот, а правдата ќе ја дели Дарко Котевски од Битола.
Победа Валандово на домашен терен ќе бара прв пролетен триумф откако во претходното коло во Велес беше шокиран тимот од Валандово, а пак Слободен ќе атакува на дури првиот историски триумф како второлигаш.
Овој натпревар се игра во Валандово, а ќе започне во 11 часот, за правдата ќе биде задолжена Виолета Јанчева од Гевгелија.
