Денес започна новата сезона 2024/2025 во ракометната Суперлига, а во рамки на 1. коло дебитантот Бисинов приреди изненадување откако ја совлада Струга со 30:31.
На полувреме Струга имаше два гола предност од 16:14, а вториот дел особено завршницата беше повеќе од возбудлива и неизвесна и за двете екипи.
Во финишот гостинот од Велес не реализираше пенал, додека пак Струга направи голема грешка, а тоа го искористи Бисинов за конечни 30:31.
Најдобар кај Струга беше Тодор Јанкуловски од осум погодоци, кај Бисинов најмногу се истакна очекувано Ивица Илиев со десет гола, а пак Марко Трајковски постигна пет гола.
Бутел Скопје на домашен терен со 29:12 на старот од сезоната го „прегази“ Куманово, кој немаше сили воопшто да парира. Првиот дел од мечот беше повеќе од јасен сигнал дека Бутел Скопје лесно ќе ги освои трите бодови, откако на полувреме беше 13:5, а само пет погодоци за 30 минути е повеќе од јасен сигнал дека Куманово беше далеку за да биде конкуретен за триумф во Скопје.
Чуварот на мрежата на Бутел, Бојан Блажески беше на висината на задачата и имаше повеќе од 20 интервеции, а тоа практично го откажа Куманово да може да парира.
Кај домашниот тим по шест погодоци имаа Филип Николов и Дејан Михајловиќ, а кај гостите Дамјан Јакумовски постигна пет погодоци.
Александар Ванев, Спортска Мрежа