Пелистер, Работнички и Камјани забележаа домашни победи во денешните четири натпревари со кои беше комплетирано десеттото коло во Втората македонска фудбалска лига, додека Македонија ЃП и Осогово одиграа без голови.
Пелистер беше најубедлив и со 6:1 го совлада Детонит Плачковица во Битола. Мартин Мирчевски го отвори резултатот во четвртата минута, а Јаков Пресилски во 31. минута зголеми на 2:0, резултат со кој се замина на паузата.
Симеон Христов во 57. минута погоди за 3:0, пред Бранимир Иванов во 64. минута да намали на 3:1. Битолчани потоа постигнаа уште три гола: Иван Ивановски во 68., Кире Стојанов во 82. и Данаил Тасев во 85. минута ги поставија конечните 6:1.
Работнички ја победи Беласица со 3:1, нанесувајќи ѝ го првиот првенствен пораз сезонава. Александар Богданоски со два гола во две последователни минути, во 14. и 15., му обезбеди предност од 2:0 на домашниот состав на полувремето.
Димитриј Димитриевски, кој влезе во игра во вториот дел, во 60. минута намали на 2:1. Сепак, само четири минути подоцна Марко Стефановски погоди за 3:1, што се покажа и како конечен резултат.
Камјани го доби соседскиот дуел со Тетекс со 3:1. Фикрет Љиварека во 14. минута донесе водство за домаќинот, а Хисар Али во 37. минута израмни на 1:1. Арбин Курти во 44. минута ја врати предноста на Камјани, кој на паузата замина со 2:1.
Победата беше потврдена во петтата минута од судиското надополнување, кога Љиварека со својот втор погодок ги постави конечните 3:1.
Македонија ЃП и Осогово одиграа 0:0 во Ѓорче Петров. Кочанчани по победата над Брера во претходното коло додадоа и гостински бод, додека домашниот состав остана без триумф и на оваа средба.
Охрид останува лидер со 25 бода, еден повеќе од Пелистер. Работнички има 21 бод и натпревар помалку, Брера е четврта со 18, исто така од девет средби, а Камјани со денешната победа стигна до 17 бода. Во долниот дел Осогово се израмни со Еуромилк на седум бода, веднаш зад Новаци со осум и Детонит со девет.
Вчера Брера го победи Новаци со 4:1, Кожуф славеше над Еуромилк со 3:1, а Охрид го совлада Шкупи со 3:0. Деталите се во веќе објавениот прилог на Спортска Мрежа.
