Прволигашот Пелистер од Битола и искусниот стратег Влатко Костов одлучија спогодбено да се разделат, откако постигнаа спогодбен раскин на договорот.
Костов година и пол го водеше Пелистер и успеа од Втора лига да го внесе во Првата македонска фудбалска лига, а клубот е во преговори за нов шеф на стручниот штаб и до почетокот на подготовките тој ќе биде претставен пред јавноста.
„По долг заеднички и пријателски разговор, клупската управа на ФК Пелистер и шефот на стручниот штаб Влатко Костов постигнаа спогодбен раскин на договорот. Клубот искрено му се заблагодарува на Костов за остварените цели и постигнатите резултати во овие една и пол година. Пелистер под негово водство се врати во Првата фудбалска лига и одигра достоинствен есенски дел од сезоната во елитната категорија. Со Влатко Костов, кој и дел од играчката кариера помина во Пелистер, останува спортски пријатели и му посакуваме многу успеси на приватен и професионален план. ФК Пелистер е во преговори за нов шеф на стручниот штаб и до почетокот на подготовките тој ќе биде претставен пред јавноста“, се вели во клупското соопштение.
Пелистер презимува на седмото место, изедначен со Брера Струмица, со по 19 бодови. Пролетниот дел од сезоната битолчани ќе го отворат токму против струмичани на домашен терен.
