Денес се играат осмифиналните натпревари од Купот на Македонија во женска конкуренција.
Спортска Мрежа претходно ги објави двојките, но и судиите кои ќе ја делат правдата на сите натпревари.
Во Македонска Каменица ќе се игра големото дерби меѓу Каменица Саса и Скопје, ждрепката посака уште во првото коло да има дерби на две екипи кои се меѓу кандидатите за Куп титулата. „Рударките“ минатата сезона загубија убедливо во финалето од Тиверија Брера, а пак тимот од Пржино кој ја брани шампионската титула сака да атакува и на Куп титула.
Дерби ќе се игра и на „Цементарница“ каде Вардар ќе го пречека Пелистер, во уште еден дерби меч на два прволигаши, Домаќинот кој дури во седмото коло стигна до првата сезонска радост во шампионатот, ќе бара следна фаза против Пелистер кој како новајлија во ПЖФЛ игра фантастично и се наоѓа во горниот дел од табелата.
Љуботен како формален гостин во Тетово ќе го пречека второлигашот Билјанини Извори од Охрид, во дуел каде тетовскиот тим е фаворит за следна фаза од Купот.
Кочани како фаворит за следна фаза на домашен терен ќе игра против второлигашот Плачковица од Радовиш и не би требало да има изненадување.
Новиот второлигаш Ржаничино ќе има вистински тест за квалитетот против прволигашот Истатов, кој е фаворит за пласман во четвртфиналето од Купот на Македонија.
Речица на домашен терен ќе се соочи со Топ Гол, тим кој минатата сезона испадна од Прва во Втора лига. Домаќинот ќе ја има улогата на фаворит за следна фаза.
Ас Јунајтед на домашен терен во Струга ќе го пречека новиот второлигаш Менада од Тетово, каде стружанки се апсолутни фаворити за пласман во следната фаза.
Во првата фаза слободен е бранителот на Куп титулата, Тиверија Брера од Струмица.
