Викендот започнува новата сезона во Третата македонска фудбалска лига регион 4, а во истата ќе се натпреваруваат 14 екипи.
Познати се сите екипи, како и распоредот за првото коло, а сезоната 2026/2027 ќе носи силна конкуренција за првото место кое води кон баражот за Втора лига.
Во новата сезона ќе се натпреваруваат Вардар Неготино, ГФК Победа Прилеп, Башкими од Јаболчиште, Борец, Бучин, Венец од Долни Дисан, Влазними Јуниор, Големо Коњари, Млекар, Питу Гули, Победа од Пепелиште, Превалец, Росоман и Ултрас.
Во рамките на првото воведно коло екипата на ГФК Победа во Прилеп ќе го пречека Превалец, Влазними Јуниор ќе биде домаќин на Росоман, а пак Бучин ќе игра со Вардар Неготино.
Големо Коњари ќе има неизвесен дуел против Башкими од Јаболчиште, Победа од Пепелиште ќе игра против Питу Гули, Борец ќе се соочи со Млекар, а пак Венец ќе биде домаќин на Ултрас.
Во новата сезона ГФК Победа има за цел да обезбеди пласман во Втора лига, Вардар Неготино кој минатата сезона испадна од Втора лига ќе биде далеку од конкурентен тим за прво место, Башкими од Јаболчиште состави тим со кој сака да го освои првото место, а во таа конкуренција ќе бидат уште неколку екипи.
Борец ќе се обиде да се консолидира и одново да атакува на шампионската титула и да има нова шанса за бараж за Втора лига, откако минатата сезона не го помина баражот.
Од сенка сигурно е дека ќе напаѓаат уште неколку екипи кои ќе сакаат да се наметнат за првото место, како Големо Коњари и Превалец кој традиционално секогаш е во горниот дел од табелата и прави „проблем“ за фаворитите во трката за првото место.
