Управниот одбор на Фудбалската федерација на Македонија донесе одлука Александар Таневски да биде нов селектор на македонската репрезентација до 21 година.
Таневски досега работеше со младинските селекции на ФФМ, вклучително и со репрезентацијата до 20 години, па одлично ја познава генерацијата фудбалери која во иднина треба да биде носител на селекцијата до 21 година. Во последните два натпревари од актуелниот квалификациски циклус, новиот селектор ќе има можност да работи со дел од помладите играчи и постепено да го формира тимот кој ќе настапува во следниот циклус.
Примарната цел ќе биде создавање конкурентна репрезентација која ќе остварува подобри резултати, но и ќе има важна улога во развојот и афирмацијата на фудбалери кои во иднина треба да бидат дел од А репрезентацијата на Македонија.
Таневски во својата тренерска кариера досега водел 196 официјални натпревари како шеф на стручниот штаб во Првата и Втората македонска фудбалска лига. Тренерскиот пат го започна во ФК Скопје, со кој обезбеди пласман во највисокиот ранг на натпреварување. Истото му успеа и со Македонија ЃП, со која стигна и до финалето на Купот на Македонија и обезбеди настап во европските купови.
Работеше и во Академија Пандев и ФК Беса, а неговиот последен клупски ангажман беше во ФК Скопје, клуб со кој обезбеди промоција од Втора во Прва лига преку бараж.
ФФМ му се заблагодари на досегашниот селектор Горан Станиќ за досегашниот ангажман и придонес во репрезентацијата до 21 година, со желби за успех во неговите идни професионални предизвици.
