Машката одбојкарска репрезентација на Македонија со пораз го започна настапот на Европското првенство. Избраниците на селекторот Јошко Миленковски загубија од домаќинот Бугарија со убедливи 3:0 во првиот натпревар од групната фаза во Софија.
Македонските одбојкари во текот на целиот натпревар се бореа и покажаа карактер, но против себе имаа исклучително квалитетен противник, кој ја оправда фаворитската улога. Како што и самите најавуваа пред почетокот на шампионатот, Бугарија располага со една од најсилните генерации во својата историја, што го потврди и на теренот.
Домашната селекција го контролираше резултатот во најголемиот дел од натпреварот и го освои првиот сет со 25:17.
Во вториот сет Македонија се обиде да одговори и да го продолжи отпорот, но Бугарите повторно беа подобри во клучните моменти и славеа со 25:19.
Во третиот сет домашните одбојкари ја задржаа контролата и со 25:18 го ставија печатот на конечниот триумф од 3:0.
Најдобар поентер во нашиот состав беше капитенот Никола Ѓоргиев со 8 поени.
За Македонија ова е почеток на уште еден голем европски предизвик, а нашите одбојкари во продолжението од шампионатот ќе имаат можност да го поправат впечатокот и да се борат за што подобар пласман во групата.
Следниот натпревар за нашата селекција е на 11 Септември против репрезентацијата на Украина со почеток од 15:00 часот.
