Најдобрата македонска тенисерка Лина Ѓорческа не успеа да го мине второто коло на ВТА 125 турнирот во Анталија, Турција, кој се игра за награден фонд од 115.000 американски долари.
Ѓорческа беше поразена од италијанската тенисерка Аурора Ѕантедески со 2:1 во сетови (4:6, 6:3, 6:1), по два часа и 15 минути игра.
Македонката одлично го започна мечот и го освои првиот сет со 6:4. Ѓорческа поведе со 3:0, но Ѕантедески успеа да се врати и да израмни на 3:3, а потоа и на 4:4. Сепак, во десеттиот гем македонската тенисерка направи нов брејк и го освои сетот.
Во вториот сет Ѕантедески веднаш направи брејк и поведе со 1:0, а со уште еден одземен сервис во продолжението стигна до 6:3 и израмнување на 1:1 во сетови.
Италијанката продолжи во ист ритам и во решавачкиот сет. По 1:1 во гемови, Ѕантедески освои пет гема по ред, направи два брејка и со 6:1 го затвори мечот за пласман во следната рунда.
Со пласманот во второто коло Ѓорческа освои 15 ВТА поени.
Македонската тенисерка следната недела продолжува со настапите на ВТА 125 турнирот во Љубљана.
