По враќањето на Брегалница од Делчево во Третата макеоднска фудбалска лига, клубот има петгодишен план за развој на клубот, но и за подобрување на инфраструктурата на Градскиот стадион во Делчево, ова го најави Даниел Гоцевски, кој што е тренер, но и дел од управата на клубот.
„Направивме петгодишен проект кој опфаќа реновирање на дел од инфраструктурата на Градскиот стадион во Делчево, стадион на кој во свое време кога беше во одлична форма се имаат одиграно меѓународни натпревари. Се сеќавам јас го гледав натпревар Македонија со Бугарија. Имаме две трибини со голем капацитет на публика, теренот моментално може да му завидат и да не речам и прволигашки екипи, тој е во одлична кондиција, на дел од трибините веќе во првата година направивме саниравме, соблекувалната е во следните неколку години, но како што кажав одиме чекор по чекор за се треба средства и време и трпение, не може се наеднаш да се направи“, вели Гоцевски во неговото во гостување во спортскиот магазин Трибина.
Делчево е погранично место, а секако доколку се подобри самата инфраструктурата, тогаш тука има идеални услови за меѓународни соработки, односно да бидат одиграни меѓународни натпревари, подготовки на екипи во летен период, а секако и можност за одигрување на натпревари на репрезентацијата на Македонија.
„Доколку успеме да стигнеме до тој некој чекор мислам дека Брегалница Делчево ќе има еден доста сериозен и стабилен стадион што може да се размислува, ние сме таму погранично место, пример може да се размислува и за многу посериозни проекти“, додава Гоцевски.
Брегалница Делчево презимува на 4. место на табелата, настапува со играчи од Делчево, со тоа што само голманот е од Македонска Каменица. Клубот е посветен на развој на млади играчи, кои во иднина ќе бидат носители на играта, па во иднина клубот размилува за враќање во Втората лига.
Во минатото клубот настапуваше и во Првата лига, во сезоната 2002/2003 и во сезона 2003/2004.
