Шампионот Ѓорче Петров во рамки на 2. коло од плеј-офот на женската ракометна Суперлига без многу мака и проблем лесно како на тренинг го совлада штипски Астибо со превисоки 48:17. Ризоска ги предводеше „лавоците“ со 12 гола, а пак Дежиќ имаше девет гола, додека пак кај Астибо стандардно Марија Анчева имаше девет гола.
Металург Автокоманда лесно го декласираа Вардар со 33:18 и ја продолжуваат доминацијата во плеј-офот после големата победа во Штип над Астибо.
Тимот од Автокоманда предводен од Јулијана Дамчевска уште во првиот дел го реши натпреварот, а најдобра во нејзиниот тим беше Гугуљанова со десет гола, а пак кај Вардар најдобар беше Неделковска со четири гола.
Ракометарките на Чаир со 31:26 го совладаа тимот на Куманово и со тоа ја запишаа првата победа во плеј-офот, откако во првото коло беа поразени од „лавиците“.
Неизвесен меч во кој Куманово одлично парираше против вицешампионот, кој сепак на крај се израдува на двата бодови.
Гулициоска имаше девет гола за Чаир, а пак Нестороска беше најпрецизна кај Куманово со осум гола.
