По успешниот почеток на сезоната и големите амбиции, ГРК Охрид го очекува првиот сериозен предизвик во Супер лигата. „Гладијаторите“ во првото коло, на домашен терен го пречекуваат Еурофарм Пелистер, во натпревар кој носи големо значење уште на стартот на шампионатот.
Охриѓани добро знаат каков противник ги очекува во „Билјанини извори“. Пелистер е состав со квалитет и високи амбиции, но домашниот тим верува дека со максимална борбеност и поддршка од трибините може да стигне до посакуваниот резултат.
Николаос Лиапис пред дербито потенцира дека целта на Охрид е јасна – победа пред своите навивачи. Грчкиот ракометар очекува тежок натпревар, во кој секоја топка ќе има голема важност.
„Сакаме да победиме на домашен терен. Натпреварот е многу е важен за нас. Знаеме дека Пелистер е силна екипа и дека ќе биде многу тешко. Ќе се бориме за секоја топка и со поддршката од нашите фанови оваа победа ќе биде наша.“- изјави Лиапис.
Дербито меѓу Охрид и Еурофарм Пелистер е закажано за утре (6 септември) од 19:00 часот во СРЦ „Билјанини извори“. Домашната атмосфера и поддршката од трибините ќе бидат дополнителен мотив за „гладијаторите“ во битката за првите бодови во новата сезона.
