По освојувањето на Суперкупот, Вардар веднаш се враќа на обврските и ја отвора новата сезона во Супер машката лига. „Црвено-црните“ на домашен терен ќе ја започнат мисијата за одбрана на шампионската титула.
Првиот предизвик за избраниците на Иван Чупиќ ќе биде Еурофарм Пелистер 2. Битолскиот состав влегува во новата сезона со Бранко Ангеловски како нов тренер, а во ростерот има неколку нови имиња со кои ќе се обиде да направи чекор напред.
Пелистер 2 дополнително го засили и стручниот штаб, па гостувањето кај актуелниот шампион ќе биде одлична можност тимот да покаже дека има сериозни амбиции во новата сезона.
Од друга страна, Вардар сака победнички да го отвори првенството и уште од стартот да испрати порака дека повторно ќе биде еден од главните кандидати за трофејот.
Натпреварот ќе се одигра денес, во СЦ „Јане Сандански“ со почеток од 18:00 часот.
