Ориол Реј Моралес продолжи со новиот клуб онаму каде што застана со Охрид – со трофеј и победнички менталитет. Шпанскиот дефанзивец, кој беше една од важните алки во одбраната на охриѓани во минатата сезона, победнички ја започна новата авантура во дресот на Висла Плок.
Во првиот официјален натпревар со полскиот гигант, Реј Моралес стигна до трофејот од Супер купот на Полска, откако Висла Плок го совлада големиот ривал Киелце со 27-24. За поранешниот ракометар на Охрид, ова е идеален старт во новата средина, а самиот тој потенцира дека сакал во новата сезона да го задржи истиот пристап со кој ја заврши претходната во Охрид.
„Беше многу добар натпревар за играње, со неверојатно високо ниво на ракомет. Јас, лично, бев многу фокусиран да ја започнам сезоната со истиот менталитет и истите чувства како што ја завршив во Охрид. Многу важен прв чекор“, вели Реј Моралес ексклузивно за Спортска Мрежа.
Шпанецот во Охрид остави впечаток со својата игра во дефанзивата, каде често беше еден од столбовите на одбраната. Сега, веднаш по трансферот во Висла, тој веќе има прв трофеј и потврда дека новата сезона ја започна на најдобар можен начин.
За Моралес следува продолжението на сезоната со Висла Плок, но стартот не можеше да биде подобар – прв официјален натпревар, прва голема победа и веднаш освоен трофеј.
