Кошаркарскиот клуб Овче Поле од Свети Николе официјално ги започна подготовките за новата натпреварувачка сезона во Првата македонска кошаркарска лига, а тимот веќе го засилува ростерот со три нови имиња.
По одличната мината сезона, во која Овче Поле беше сериозен конкурент за пласман во Суперлигата, амбициите во Свети Николе остануваат високи. Клубот најавува тим кој ќе се бори за самиот врв на Првата лига и место во македонската кошаркарска елита.
Првото засилување е Никола Масевски, кој пристигнува од редовите на ФМП Струмица. Масевски во кариерата настапувал и за Водно Санс, Баскет Кам и МЗТ Скопје, а сега ќе го облече зелено-жолтиот дрес.
Во Свети Николе се враќа и добро познато лице. Борјан Ангелковски повторно ќе биде дел од Овче Поле, откако минатата сезона настапуваше за Соколи Штип. Ангелковски пред две години ги бранеше боите на тимот и добро ја познава атмосферата во клубот. Станува збор за кошаркар висок 201 сантиметар, кој може да ги покрива позициите 4 и 5.
Третото ново име е Теодор Нановски, млад и талентиран бек од Скопје, кој зад себе има богато кошаркарско искуство и одлична сезона во Литванија. Својот кошаркарски пат го започнал во ФМП Академија, а настапувал и за Водњански Лисици и Работнички.
Нановски во Овче Поле пристигнува со одличен напаѓачки потенцијал, зрелост во играта и голема желба за понатамошен развој.
Трите засилувања се дел од планот на клубот да создаде конкурентен состав кој ќе може да се вмеша во борбата за висок пласман.
Овче Поле минатата сезона покажа дека има квалитет за сериозна борба за Суперлигата, а сега со новите имиња и амбициите кои растат, тимот од Свети Николе влегува во новата сезона со јасна цел – пласман во кошаркарската елита.
А покрај тимот на теренот, од клубот повторно ја очекуваат и големата поддршка од трибините, каде навивачката група „Овчари“ минатата сезона создаваше одлична атмосфера и беше вистинскиот „шести играч“ на Овче Поле.
