Охрид е во финалето на меморијалниот турнир „Крсте Андоновски“, откако вчера одигра реми (30-30) против Загреб. Бодот беше доволен за „гладијаторите“ да го освојат првото место во групата А, благодарение на голот на Дарко Ѓукиќ во самиот финиш.
Во изјава за Спортска Мрежа, тренерот на Охрид, Борис Ројевиќ, му честиташе на Загреб за натпреварот, но посебно ја истакна поддршката од домашната публика. Воедно, тој им замери на своите ракометари за пристапот во првото полувреме, но беше задоволен од реакцијата и енергијата што ја покажаа по паузата.
„Па, би му честитал на Загреб на фер и одличниот натпревар. Исто така, благодарам и на публиката што дојде во голем број и што нè турна до ова големо реми против сигурно, огромниот фаворит денес. Им замерувам на моите момци за првото полувреме, а исто така им честитам за второто полувреме. Во првото немавме ниту волја, ниту желба, ни ништо. Не игравме тимски, не си помагавме. Сето тоа во второто полувреме, по состанокот, се промени – се фативме за рака и си рековме дека одиме со потполно друга енергија. Така што, ете… нè очекува финалето со Вардар, па ќе видиме кој е ,,жив” и подготвен за истото.“
Охрид, денес го очекува нов голем предизвик, бидејќи од 20:15 часот ќе се сретне со Вардар во финалето. Ројевиќ е свесен дека тимот го очекува тежок период со густ распоред, па покрај желбата за трофејот, ќе мора внимателно да се распредели и силата на играчите.
„Како што реков, ќе биде многу тешко финале за нас. Во следните десетина дена, нè очекуваат четири натпревари: два од Регионалната лига- во Будва, Панчево, и тоа сè во два дена, потоа пат до Гевгелија за Супер купот, и потоа уште доаѓањето на Пелистер овде во првото коло од Супер Лигата. Мора малку да видиме, да пресметаме, да бидеме вистинските, но исто така и да сочуваме некои играчи за понатаму. Тоа сега е нашата примарна задача.“- изјави Ројевиќ за Спортска Мрежа.
Охрид вечерва од 20:15 часот ќе се бори за трофејот против Вардар, со желба да го повтори успехот од минатогодишното издание на турнирот.
