Вистинска трансфер „бомба“ се случи вечерва, откако амбициозниот тим на Слога Виница, кој е есенски шампион во Трета лига – Исток го претстави првото зимско засилување, станува збор за искусниот Иван Настевски, познат како Меси.
33-годишниот Настевски во Виница доаѓа од редовите на второлигашот Детонит Плачковица, а во својата кариера популарниот Меси има настапувано и за Охрид, Скопје, Гостивар, Брегалница, Кит Го Пехчево, Македонија ЃП, Еуромилк ГЛ, Тетекс, Вардар и Работнички, а има настапувано и во Србија за екипата на Нови Пазар и за грчкиот Олимпијакос Волос.
Во сезона 2008/2009 Настевски со екипата на Македонија ЃП стана шампион во Првата македонска фудбалска лига.
Со своето прволигашко искуство, како и меѓународно искуство дефинитивно Настевски го зголемува квалитетот во тимот предводен од Емил Грнев, со што Слога Виница освен што треба рутински да одигра во пролетниот дел и да ги добие сите натпревари убедливо во Трета лига – Исток, фокусот веќе го става на баражот кој треба да се добие за Слога Виница да се врати во Втора лига.
Како што дознава Спортска Мрежа во следните денови ќе има уште неколку трансфер „бомби“ во Виница, а тимот ќе биде конкурентен за поголем дел од второлигашите.
