Македонските кадети славеа голема победа над Швајцарија со 89:76, иако во еден момент имаа негатива од дури 21 поен. Со фантастично второ полувреме и неверојатен пресврт, избраниците покажаа карактер и стигнаа до вториот триумф на шампионатот.
Швајцарците фуриозно го отворија натпреварот, особено во шутот за три поени. Погодија шест од првите седум обиди од далечина и по неполни осум минути имаа убедливо водство од 27:12. До крајот на првата четвртина постигнаа уште една тројка, па по десет минути Македонија имаше негатива од 16:30.
Во вториот период Илија Коневски внесе дополнителна енергија во македонската игра. Нашиот бек за кратко време постигна 15 поени и помогна разликата да се намали на едноцифрена.
Во 16. минута Македонија заостануваше со девет поени (33:42), но Швајцарија одговори со серија од осум поени и повторно се одлепи на 50:33. На полувремето противникот имаше предност од 53:37.
Но, второто полувреме донесе комплетно различна слика на теренот.
Македонија тргна многу поагресивно, а по поените на Александар Зунзуровски негативата повторно се намали на едноцифрена (44:53). На средината од третата четвртина, Дион Шабани го постигна својот 11. поен за 50:59, а по одличната акција на Зунзуровски и реализацијата „2+1“, Македонија стигна до 53:61. Набргу потоа беше и 56:63.
Нашите кадети продолжија да притискаат, а со фантастична завршница на третата четвртина направија целосен резултатски камбек. Во последните десет минути влегоа со само три поени негатива – 64:67.
Во решавачката четвртина на сцена стапија Зунзуровски и Шабани, токму кога беше најпотребно. Израмнувањето стигна во 32. минута, кога Александар Котевски реализираше четири поени во низа за 70:70.
Тоа беше само најава за целосниот пресврт.
Македонија во последниот период одигра одлично, го наметна својот ритам и целосно ја презеде контролата над натпреварот. Во второто полувреме нашите кадети постигнаа неверојатни 52 поени, а примија само 23, за на крајот да стигнат до убедлива победа од 89:76.
Најефикасен во македонскиот состав беше Илија Коневски со 26 поени и шест скока. Александар Зунзуровски постигна 19 поени, со четири асистенции и три скока, додека Дион Шабани реализираше 18 поени, шест скока и три асистенции.
Ова е втора победа за Македонија на шампионатот, за скор од 2-2 по четири одиграни натпревари.
Македонија денес го игра последниот натпревар од групната фаза. Противник ќе биде селекцијата на Украина, а дуелот започнува во 18:30 часот.
