Меѓу двата настапи против шкотскиот Хибернијан во третото квалификациско коло од Лигата на конференции, тетовска Шкендија се враќа на обврските во домашното првенство каде ја очекува големото дерби од второто коло во Првата лига, против актуелниот шампион, Вардар.
По враќањето од Шкотска, „црвено-црните“ од Тетово имаа на располагање два дена за максимална подготовка пред овој натпревар. Голманот на Шкендија, Ферат Рамани, ја потврди високата подготвеност на целиот тим за неделниот дерби-дуел во Скопје.
„Секогаш сме максимално подготвени и за нас секој натпревар има исто значење. На секој терен излегуваме со една единствена цел – да победиме. Без разлика кој е од спротивната страна, ги следиме замислите на шефот на стручниот штаб и на теренот го даваме последниот атом од силата,“ истакна Рамани.
Младиот чувар на мрежата верува во уште едно позитивно издание на тимот, иако признава дека згуснатиот распоред и заморот од патувањата можат да бидат сериозен противник за тетовци.
„Како и секогаш, одиме само на победа, ништо друго. Екипата е подготвена. Иако чувствуваме малку замор од патувањето и силниот ритам, тоа е фудбалот – подготвени сме за секој предизвик. Утре одиме без калкулации по сите три бода,“ порача Рамани.
Пред овој голем дерби-пресметка, Шкендија се соочува со дури четири значајни отсуства. Во комбинација за тимот нема да бидат првиот голман Бабукар Гаје, дефанзивецот Бојан Димоски и напаѓачот, Себастијан Спахиу. Дополнителна грижа е и состојбата со голманот Астрит Амзаи, кој сè уште се рехабилитира од физички проблеми и неговиот настап е под голем знак прашалник.
Големото дерби на второто коло, Вардар – Шкендија, ќе се одигра на арената „Тодор Проески“ во Скопје, со почеток од 17:00 часот.
