ГФК Тиквеш продолжува со максимален ефект на стартот од новата сезона во Првата македонска фудбалска лига. Кавадарчани на гостувањето во Куманово го совладаа Башкими со убедливи 0-5 и по две одиграни кола имаат шест бода на своето конто.
Домаќинот успеваше да го одржи резултатот во почетната фаза, иако Тиквеш имаше иницијатива и контрола врз играта. Отпорот на Башкими беше скршен во 36. минута, кога Лусианињо асистираше, а Висдом ја затресе мрежата за 0-1.
Само шест минути подоцна кавадарчани повторно реализираа. Лавал се запиша во листата на стрелци за 0-2, со што Тиквеш на паузата замина со комотна предност.
Во вториот дел гостите продолжија да го контролираат натпреварот, а нов погодок пристигна во 72. минута. Лавал повторно беше прецизен и со својот втор гол на средбата го зголеми водството на 0-3.
Башкими во финишот не успеа да се спротивстави на налетите на Тиквеш. По поништен гол на Ренатињо, Попзлатанов во 81. минута погоди за 0-4, додека конечните 0-5 ги постави Ацковски во 88. минута со одличен удар од далечина.
Со две победи од исто толку натпревари и гол-разлика 7-0, Тиквеш испраќа сериозна порака уште на почетокот од првенството и го потврдува лидерското место на табелата.
