Македонскиот фудбалски тренер Шабан Сулејман е пред важна одлука за продолжението на својата тренерска кариера, откако за 38-годишниот стратег постои сериозен интерес од клубови од Саудиска Арабија, Кувајт и Дубаи.
Сулејман зад себе има богато тренерско искуство, иако се работи за млад стратег. Тренерската кариера ја започна како помошник во Беса од Добри Дол, по што работеше како прв тренер на младинските категории на Работнички. Беше дел и од стручниот штаб на првиот тим на „романтичарите“ минатата сезона кога тимот за влакно не успеа да избори опстанок по успешната пролетна полусезона, а на што се должеа слаби резултати од есенскиот дел од претходните стручни штабови на тимот од Дебар Маало, а работеше и како помошник во Гостивар.
Посебно значаен период во неговата кариера беше работењето во Шкендија Арачиново во периодот кога клубот направи голем успех и испиша историја со пласман од Трета во Втора лига, а потоа и од Втора во Прва лига во само две сезони.
Сулејман има и интернационално искуство. Беше дел од стручниот штаб на косовска Лирија, каде имаше успешна сезона која заврши со пласман во елитната конкуренција. Токму поради тоа, евентуалниот ангажман во странство нема да биде негов прв интернационален предизвик.
Последниот ангажман на 38-годишниот Сулејман беше во стручниот штаб на Работнички, каде соработуваше со Муарем Муарем. Во пролетниот дел од сезоната тимот од Дебар Маало одигра одлично и освои максимален број бодови, но слабата есенска полусезона беше пресудна и Работнички не успеа да обезбеди опстанок во Првата лига.
Според информациите до кои дојде Спортска Мрежа, за Сулејман во моментов постои интерес од три странски дестинации – Саудиска Арабија, Кувајт и Дубаи, но неговото име е интересно и за клубови во Македонија. Постои можност за ангажман во македонски прволигаш, но и во еден тим од Втората лига.
Пред младиот стратег сега е период на избор. Сулејман ќе треба да одлучи дали следниот чекор во кариерата ќе биде нов домашен предизвик или продолжување на интернационалната приказна.
