Екипата на Вергови го освои третото место на турнирот во мал фудбал „Ораовица 2026“, откако во натпреварот за бронзениот медал славеше со убедливи 6-3 против Тобако Јаков & Такси Бате ЗЦ.
Дуелот понуди интересен и динамичен фудбал. Вергови рано поведе со 2-0, противникот успеа да намали на 2-1, но потоа победничкиот состав целосно ја презеде контролата на теренот, наметна свое темпо и со ефикасна игра стигна до убедлива победа од 6-3.
Со овој триумф, Вергови го освои третото место и парична награда од 50.000 денари, додека Тобако Јаков & Такси Бате ЗЦ го заврши турнирот на четвртата позиција, за што беше награден со 25.000 денари.
По натпреварот за третото место, следува големото финале на турнирот „Ораовица 2026“, во кое силите ќе ги одмерат Фреигхт Оне и Вила Клепало во борбата за шампионскиот трофеј.
