Прволигашот ГФК Тиквеш продолжува со засилувањата во пресрет на продолжението од сезоната, а најново име во редовите на кавадаречкиот клуб е Октај Ракипи, кој и официјално го облече црвено-белиот дрес.
Ракипи во Кавадарци пристигнува од словенечкиот Јесенице, а зад себе веќе има искуство и на македонската фудбалска сцена, настапувајќи за Беса 1976, Борец Велес и Шкендија. Станува збор за млад, амбициозен и технички поткован фудбалер, од кого во Тиквеш очекуваат да донесе дополнителен квалитет и конкуренција во тимот.
Од клубот истакнуваат дека неговата работна етика, енергија и желба за напредок целосно се вклопуваат во визијата што ја градат за иднината на Тиквеш, изразувајќи уверување дека пред двете страни претстои успешно заедничко поглавје.
Со ангажманот на Ракипи, тренерот Оливер Богатинов добива уште една квалитетна опција во средниот ред, со што дополнително се зголемува конкуренцијата во составот.
Тиквеш во одлично расположение го пречекува новото засилување, откако сезоната во Првата македонска фудбалска лига ја отвори на убедлив начин. Кавадаречкиот состав во првото коло славеше со 5-1 против Арсими, испраќајќи јасна порака дека и оваа сезона ќе има високи амбиции во домашниот шампионат.
Со доаѓањето на Октај Ракипи, Тиквеш продолжува да го комплетира ростерот, со цел тимот да остане конкурентен и да ги оствари зацртаните цели во новата прволигашка сезона.
