Второлигашот Новаци продолжува активно да го комплетира ростерот за новата сезона, а најново засилување во редовите на клубот е Јусуф Каба, кој пристигнува од актуелниот прволигаш Струга Трим Лум.
Станува збор за 22-годишен играч за врска, кој и покрај младоста веќе има солидно искуство на македонската фудбалска сцена. Каба своите први фудбалски чекори ги направи во Охрид, а потоа беше дел од младинските категории на Струга Трим Лум, од каде стигна и до првиот тим.
Во дресот на Струга забележа пет настапи во Првата македонска фудбалска лига, со вкупно 112 минути, додека во Купот на Македонија одигра три натпревари и собра 154 минути на теренот.
Во изминатите сезони стекнуваше дополнително искуство преку позајмици во Караорман, Победа и Шкендија Арачиново, каде минатата сезона беше еден од поважните фудбалери во тимот и даде свој придонес во историскиот успех – пласманот на клубот во Првата македонска фудбалска лига.
Во својата кариера двапати беше шампион со Струга Трим Лум во сезона 2022/2023 и 2023/2024.
По враќањето во Струга Трим Лум, Каба не остана долго во редовите на стружани и сега ќе ја продолжи кариерата во дресот на Новаци, каде ќе претставува значајно засилување во средниот ред.
Со неговото доаѓање, младиот штипски стратег Иван Варадиновски добива уште една квалитетна опција во играчкиот кадар, додека Новаци продолжува да гради конкурентен тим со кој ќе атакува на што подобри резултати во новата сезона од Втората македонска фудбалска лига.
