Македонскиот Дејвис куп репрезентативец Олег Приходко не успеа да стигне до титулата на ИТФ турнирот во полскиот град Козалин, кој се играше за награден фонд од 30.000 долари. Во финалниот дуел беше поразен од Португалецот Тиаго Переира со 2-0 во сетови (6:1, 7:5), по 68 минути игра.
Првиот сет започна добро за Приходко, кој поведе со 1:0 во гемови, но Переира потоа целосно ја презеде контролата и со серија од шест последователни гема стигна до водство од 1-0 во сетови.
Во вториот сет се водеше далеку поизрамнета борба. Двајцата тенисери успешно ги чуваа своите сервиси сè до последниот, 12. гем, кога Португалецот направи клучен брејк и со 7:5 го затвори мечот во своја корист.
До пласманот во финалето, Приходко оствари четири убедливи настапи. Во првото коло го елиминира Италијанецот Лоренцо Берто, потоа беше подобар од Полјакот Адам Мајчрзак, во четвртфиналето по три сета го совлада Шпанецот Иманол Лопез Мориљо, а во полуфиналето го изненади првиот носител Даниел Михалски со сигурни 6:1 и 6:4.
Следен предизвик за македонскиот тенисер ќе биде ИТФ турнирот во Куршумлијска Бања, каде ќе настапи следната недела.
