Женскиот ракометен клуб Пелистер продолжува со засилувањата за новата сезона, а како што објави Спортска Димензија, нов член на битолскиот суперлигаш е една од најталентираните млади македонски ракометарки, Еџе Сејадин.
Станува збор за ракометарка која зад себе има одлична сезона и важи за една од најголемите надежи на македонскиот женски ракомет. Сејадин беше најдобар стрелец во кадетската лига со 86 постигнати погодоци, додека во Првата лига заврши како втор стрелец со 164 гола, веднаш зад Анастасија Сентовска.
Младата ракометарка минатото лето од Ресен направи трансфер во Стружанка, каде што со своите настапи го привлече вниманието на повеќе клубови. Одличните партии сега ѝ донесоа и трансфер во Пелистер, каде што ќе има можност да настапува во Супер лигата и да се докажува против најсилните екипи во македонскиот женски ракомет.
Битолскиот клуб првично требаше новата сезона да ја започне во Првата лига, но по повлекувањето на Астибо од елитното натпреварување, Пелистер го задржа своето место во Супер лигата. Со тоа, Сејадин ќе добие можност уште оваа сезона да игра против екипи како Ѓорче Петров, Чаир, Вардар и останатите суперлигашки состави.
Со ангажманот на една од најперспективните млади ракометарки во земјата, Пелистер добива значајно засилување во ростерот, а Еџе Сејадин нова шанса за дополнителен напредок и афирмација на највисоко домашно ниво.
