Македонската машка јуниорска репрезентација не успеа да обезбеди место во разигрувањето за повисок пласман на Европското првенство од Дивизијата „Б“, кое се одржува во Хрватска. Во вчерашниот натпревар за пласман, избраниците на селекторот Миодраг Тодоровиќ беа поразени од Финска.
Финците одиграа одлично во првото полувреме и токму тогаш ја изградија клучната предност. По првата четвртина водеа со 26:13, а со сигурна и ефикасна игра до паузата ја зголемија разликата на убедливи 55:27.
Во второто полувреме македонските јуниори прикажаа многу подобро издание. Со поцврста одбрана и поразновидна игра во нападот успеаја да ја намалат негативата на 59:40 во третата четвртина. Сепак, Финска веднаш возврати со серија од шест поени и повторно се одлепи на 65:42, со што ја задржа контролата врз натпреварот до самиот крај.
Најефикасен во македонскиот состав беше Цветковски со 20 поени. Данев постигна 15 поени и додаде пет скока, додека капитенот Ѓорѓевиќ имаше сеопфатен настап со седум поени, шест скока и дури 15 асистенции.
Македонската репрезентација денеска ќе има нова шанса за подобар резултат. Нашите јуниори од 15:30 часот ќе се соочат со селекцијата на Исланд, која вчера беше поразена од Швајцарија.
Победникот од овој дуел ќе продолжи во борбата за 13. место на Европското првенство, додека поразениот ќе разигрува за 15. позиција. И покрај вчерашниот неуспех, македонските јуниори ќе имаат можност шампионатот да го завршат со позитивен впечаток и што е можно подобар конечен пласман.
