Младиот македонски тенисер Марко Алексовски (15) продолжува со одличните настапи на меѓународната сцена, откако го освои третото место на ИТФ турнирот „Дема Куп“ од категоријата Ј30 во Софија. Во денешното полуфинале тој беше поразен од бугарскиот тенисер Мартин Бонев со 2-0 во сетови (7:6(5), 6:2).
До полуфиналето, Алексовски забележа четири убедливи победи. Во групната фаза најпрво го совлада Гркот Јоанис Мацокас со 2-0 (6:3, 6:0), потоа беше подобар од Бугаринот Кристијан Стефанов со 2-0 (6:1, 6:1), а во последниот натпревар од групата го победи Доминик Чопек од Велика Британија со 2-0 (6:0, 6:3). Во четвртфиналето го елиминираше романскиот тенисер Матеј Суцу, исто така со максимални 2-0 во сетови (6:3, 6:1).
Со ова Алексовски ја продолжи успешната серија настапи на ИТФ турнирите за тенисери до 18 години. Само една недела претходно тој играше во финалето на турнирот во Солун, а без поголема пауза настапи и во Софија, каде повторно стигна до завршницата.
По краток одмор од два дена, Алексовски веќе од понеделник ќе настапи на ИТФ турнирот од категоријата Ј60 во Скопје, кој ќе се игра на терените на ТК Југ.
