Женската сениорска одбојкарска репрезентација на Македонија денеска во хотелот „Континентал“ во Скопје го одржа првиот собир, со што официјално ги започна подготовките за настапот на Медитеранските игри во Таранто.
Селекторот Милош Гавриловиќ, по дебитантскиот циклус на клупата на националниот тим, сега има појасна слика за составот со кој располага. Сепак, списокот за овој собир е изменет бидејќи дел од младите репрезентативки не се на располагање поради настапот со селекцијата до 20 години во зонските квалификации за Европското првенство 2027.
Македонските одбојкарки целокупните подготовки ќе ги реализираат во спортскиот центар „Форца“ во Скопје, а првиот тренинг е закажан за вечерва.
За Македонија ова ќе биде втор последователен настап на Медитеранските игри, откако репрезентацијата учествуваше и на изданието во Оран, Алжир во 2022 година.
На турнирот во Таранто, Македонија ќе игра во групата Б, заедно со репрезентациите на Турција, Грција, Алжир и Косово. Во групата А ќе се натпреваруваат Италија, Србија, Египет, Босна и Херцеговина и Сирија.
