Македонската фудбалска репрезентација ќе се натпреварува во групата Ј во квалификациите за Светското првенство 2026, кое ќе се одржи во Канада, САД и Мексико. Покрај Македонија, во оваа група се и Белгија, Велс, Казахстан и Лихтенштајн.
Квалификациите започнуваат во март 2025 година за групите со пет репрезентации, додека групите со четири репрезентации ќе стартуваат во септември истата година.
Првопласираните од групите директно ќе обезбедат пласман на СП 2026, додека второпласираните ќе играат бараж. Во баражот ќе се приклучат и четири најдобри селекции од Лигата на нации кои не успеале да се квалификуваат преку групната фаза.
Овој Мундијал ќе биде прв во историјата со 48 учесници, што отвора нова можност за „рисовите“ да го остварат својот сон за прво учество на светско првенство.
Македонија претходно се има соочено со Белгија и Велс во квалификации, но за првпат ќе игра против Казахстан. На последните квалификации, македонската селекција го освои второто место во групата, во баражот ја елиминираше Италија, но потоа беше поразена од Португалија.
Светското првенство ќе започне на 11 јуни 2026 година и ќе трае до 19 јули 2026 година.
