Неготино од 22 до 24 август ќе биде во знакот на младинскиот фудбал, откако на Градскиот стадион ќе се одржи 10. Меморијален турнир „Зоран Недев – Фелер Куп 2026“, кој годинава слави значаен јубилеј – десет години традиција, спортско пријателство и детски насмевки.
Организаторите најавуваат учество на голем број екипи од Македонија и регионот, а младите фудбалери ќе се натпреваруваат во повеќе возрасни категории. На 22 август на програмата се генерациите 2014 (7+1), 2016 (6+1) и 2018 (5+1), ден подоцна ќе настапат генерациите 2015 (7+1), 2017 (6+1) и 2019 (5+1), додека 24 август е резервиран за турнирот во конкуренција на девојчиња родени 2013 година и помлади (6+1).
Покрај натпреварувачкиот дел, организаторите подготвија и богат награден фонд. Најдобрите три екипи ќе добијат пехари и медали, медали ќе бидат доделени и за екипите што ќе завршат од четвртото до шестото место, а првопласираните состави ќе бидат наградени и со комплет дресови. Предвидени се и специјални признанија за фер-плеј екипа, тимот со најмалку примени голови, како и за екипата со најмногу постигнати погодоци, додека за сите учесници се најавени и бројни изненадувања.
Меморијалниот турнир и оваа година ќе биде посветен на зачувување на споменот на Зоран Недев – Фелер, преку детската игра, фер-плејот и љубовта кон фудбалот – вредности врз кои е изграден овој препознатлив спортски настан.
Како и во изминатите години, Спортска Мрежа ќе биде медиумски покровител на турнирот, обезбедувајќи целосно медиумско следење на јубилејното издание, со информации, фотографии и извештаи од сите три натпреварувачки дена. Очекувањата се и годинава „Зоран Недев – Фелер Куп“ да понуди одлични натпревари, нови пријателства и уште една успешна промоција на младинскиот фудбал.
