Прволигашот Башкими ги започна подготовките за новата сезона, со која официјално стартува ново поглавје во клупската историја. Кумановскиот состав во новата сезона ќе го предводи новиот шеф на стручниот штаб Гајур Реџепи, додека негов помошник ќе биде Бесим Мустафи, кој доаѓа од клупската академија.
Од клубот порачаа дека ги очекува долг пат исполнет со предизвици, напорна работа и позитивни изненадувања, нагласувајќи дека борбениот дух останува препознатлив белег на Башкими.
Воедно, Башкими упати благодарност до досегашниот тренер Баже Јанакиевски за неговата посветеност и придонес во текот на изминатата сезона, посакувајќи му многу успех во понатамошната тренерска кариера.
Пред стартот на подготовките, клубот се раздели и со поголем број фудбалери. Дресот на Башкими повеќе нема да го носат Есмин Личина, Борјан Пановски, Амир Јашари, Сумер Хасан, Фисник Зука, Емир Асани, Давид Манасиевски, Анатолиј Петејчук, Решул Мемети, Филип Алексовски, Фодај Травели и Емануел Аворнио. Од клубот им се заблагодарија за професионалниот однос, вложениот труд, посветеноста и жртвата што ја покажаа бранејќи ги боите на Башкими, посакувајќи им многу успех во продолжението на нивните кариери.
Минатата сезона Башкими по подолга пауза успеа да се врати во Првата македонска фудбалска лига, а во претстојниот шампионат клубот ќе се соочи со големи предизвици во борбата за што подобри резултати меѓу најдобрите македонски екипи.
Од раководството упатија и повик до сите граѓани, компании и љубители на клубот да дадат свој придонес во понатамошниот развој и јакнење на Башкими.
Новата сезона во Првата македонска фудбалска лига започнува на 25 јули, а Башкими истата ја отвара против Силекс во Кратово.
