По одличната сезона во дресот на Осогово, искусниот напаѓач Филип Димоски и официјално се раздели со кочанскиот второлигаш, оставајќи зад себе значаен белег во редовите на „жетварите“.
Димоски беше еден од најзаслужните за успешната сезона на Осогово, која клубот ја заврши на високото шесто место во Втората македонска фудбалска лига. Во пролетниот дел од шампионатот, по зимскиот трансфер од Победа, 26-годишниот голгетер постигна дури 13 голови во дресот на Осогово, а ако се додадат и трите погодоци за Победа во есенскиот дел, сезоната ја заврши со вкупно 16 голови.
Со ваквиот голгетерски учинок, Димоски се најде меѓу четирите најдобри стрелци во Втората лига, а зад себе ја остави и најуспешната сезона во својата кариера. Во дресот на Осогово двапати постигна хет-трик, а со своите голови и настапи во повеќе наврати директно носеше важни бодови за кочанскиот состав.
Во текот на својата кариера настапуваше и за Победа, Охрид, Детонит Плачковица, Каменица Саса, Питу Гули, Вардар Неготино и 11 Октомври, клубот каде што ги направи своите први фудбалски чекори.
По разделбата со Осогово, Димоски веќе има неколку конкретни понуди на својата маса. Според информациите на Спортска Мрежа, интерес за неговите услуги покажале повеќе клубови, а искусниот напаѓач во наредниот период ќе треба да ја избере најдобрата опција и да одлучи каде ќе ја продолжи својата кариера.
Неговите партии во изминатата сезона уште еднаш потврдија дека станува збор за напаѓач кој знае како се постигнуваат голови и кој може да направи разлика на теренот, па нема сомнеж дека неговата следна „станица“ ќе биде внимателно следена од фудбалската јавност.
