Прволигашот Брегалница продолжува да се екипира за новата сезона која стартува на 25 јули. „Сините“ ја продолжија соработката со Анџело Николовски, кој по одличната сезона одлучи да ја продолжи соработката со Брегалница и за следната сезона.
Николовски по вторпат успеа со Брегалница да обезбеди промоција од Втора во Прва лига, а во неговата кариера тоа му успеа и со Македонија ЃП како шампион, а пак како вицешампион обезбеди промоција во елитата и во дресот на Гостивар. Николовски игра како лев бек и лево крило, а штипјанецот е поранешен младински репрезентативец на Македонија.
Тоа што Спортска Мрежа го најави пред повеќе од дваесетина дена сега Брегалница го потврди – искусниот дефанзивец Дарко Стојанов се врати во Брегалница и одново ќе го носи „синиот“ дрес.
Зад Стојанов е богата и успешна кариера. Првите сениорски настапи ги запиша во Вардар, а потоа настапуваше и за Маџари Солидарност, Беласица и Брегалница, каде остави длабока трага и стана едно од препознатливите имиња на клубот од Штип.
Штипјанецот потоа кариерата ја продолжи во редовите на поранешниот вицешампион Хоризонт Турново, Борец, Ренова, Детонит Плачковица, Слога Виница и Кожуф, додека интернационално искуство стекна во бугарскиот Дунав Русе.
Голманот Мартин Миленковски е повратник во редовите на Брегалница, а доаѓа од тимот на Каменица Саса кој испадна во Трета лига регион 3.
Новата сезона Брегалница ја отвара против шампионот Вардар во гости.
