Женската репрезентација на Македонија „Под 18“ го одигра првиот контролен натпревар во рамките на подготовките за Европското првенство од Дивизијата „Б“, кое од 31 јули до 9 август ќе се одржи во романскиот град Тулчеа. Во Ботевград, избраничките на селекторот Виктор Петровски беа поразени од Бугарија со 64:58, но прикажаа солидна игра и до самиот крај останаа во борба за поволен резултат.
Македонскиот состав на ова гостување настапи без неколку важни кошаркарки, бидејќи поради различни причини недостасуваа Груевска, Колева и Димитровска. И покрај тоа, младите репрезентативки одиграа борбено, а меѓу нив се истакна и Милосављевиќ, која неодамна се врати во тренажен процес.
Домашната селекција во текот на целиот натпревар одржуваше мала резултатска предност. Бугарија ја доби првата четвртина со 21:13, а на полувремето замина со водство од 36:29.
Во второто полувреме Македонија заигра значително подобро и по третата четвртина ја намали разликата на 51:46. Во неизвесната завршница нашите кошаркарки се доближија на само еден посед негатива, но не успеаја целосно да го свртат резултатот, па победата остана кај домаќинот.
Најефикасна во македонскиот тим беше капитенот Дора Алексова со 14 поени и два скока. Пислевска постигна 11 поени и запиша три скока, Трајковска додаде осум поени, додека Милосављевиќ средбата ја заврши со шест поени.
Македонија и Бугарија, според претходниот договор, утре ќе одиграат уште еден контролен натпревар во Ботевград. По оваа проверка, македонската репрезентација се враќа во Скопје, каде ќе ги продолжи подготовките за настапот на Европското првенство од Дивизијата „Б“ во Тулчеа.
