Новиот прволигаш Арсими продолжува активно да го комплетира играчкиот кадар за претстојната сезона, а најново засилување во редовите на тимот од Чегране е колумбискиот напаѓач Диего Контрерас.
22-годишниот офанзивец пристигнува од албански Партизани, каде што со своите настапи во изминатата сезона се наметна како едно од најпријатните откритија во шампионатот и го привлече вниманието на повеќе клубови од странство. Пред ангажманот во Албанија, Контрерас настапуваше за Јагуарес во елитната лига на Колумбија.
Арсими го обезбеди неговиот потпис на едногодишна позајмица, реализирана благодарение на успешната соработка и постигнатиот договор меѓу македонскиот и албанскиот клуб. Воедно, од клубот посочуваат дека овој трансфер е уште една потврда за одличните односи, меѓусебната доверба и почит што постојат меѓу двете раководства.
Во Чегране веруваат дека Контрерас ќе донесе дополнителен квалитет во нападот и со своите голови ќе помогне во остварувањето на клупските амбиции во новата сезона.
Арсими ќе ја започне својата прволигашка авантура на 25 јули, кога во првото коло од Првата македонска фудбалска лига ќе гостува кај Тиквеш во Кавадарци.
